Bjarni Már spilar á Aðventuhátíðinni!

Krílakaffi í Ólafíustofu einn fimmtudag í mánuði. ATH. þann 5. mars verðum við í nýja sendiráðsbústaðnum á Aker bryggju, Stranden 83. Notaleg stund og ljúf stund fyrir börn og fullorðna. Það er tilvalið fyrir foreldra og forráðamenn, afa og ömmur, eða aðra sem eru að gæta ungra barna, að koma og spjalla saman, syngja með litlu krílunum og eiga gæðastund í góðu samfélagi. Í Ólafíustofu er ágætis aðstaða fyrir krílin, skiptiborð, matarstólar, stórt leikteppi, leikföng og bækur en síðast en ekki síst hin krílin sem er svo gaman að hitta. ( ...svo erum við líka með sófa fyrir fullorðna fólkið) Boðið er upp á léttar veitingar og kaffi. Húsið opnar kl. 11. Verið öll hjartanlega velkomin!!

Verið hjartanlega velkomin að vera með í páskabralli í Bergen þar sem sunnudagaskóli, leikur, fallegur kórsöngur Sönghópsins Björgvins, skapandi verkefni og hugguleg samvera verða á boðstólnum laugardaginn 14.mars. Við byrjum á hugljúfum sunnudagaskóla kl 13:00 í kirkjunni. Við ætlum að leika okkur með þema páskanna, þegar lífið sigrar dauðann! Það verða fullt af skapandi og skemmtilegum verkefnum og stöðvum. Viltu blása úr eggi? Eða skreyta páskagreinar? Mála,líma og föndra eitthvað fínt? Eða bara spjalla við alla hina yndislegu Íslendingana sem mæta? Það er svo gaman og gott fyrir sálina að stússa og bralla og búa eitthvað til! Við hvetjum ykkur til að koma við, hitta aðra Íslendinga, spjalla, föndra og njóta samverunnar saman. Verið hjartanlega velkomin til okkar.

Aðalfundur Íslensku kirkjunnar í Noregi verður haldinn þann 15. mars næstkomandi í Bakkehaugen kirkju í Osló. Guðsþjónusta verður samkvæmt venju á undan og hefst hún kl. 14. Kirkjukaffi á eftir. Sunnudagaskólinn verður á sínum stað þar sem góðir leiðtogar taka vel á móti krökkunum. Aðalfundurinn verður á eftir guðsþjónustu í safnaðarheimili kirkjunnar og hefst kl. 15.30. Kjörnefnd óskar eftir framboðum en eitt sæti er laust í varastjórn og eitt sæti í varastjórn. Áhugasömum er bent á að hafa samband við kjörnefnd ( kjornefnd@kirkjan.no ) eða sóknarprest Lilju Kristínu Þorsteinsdóttur. Aðalfundur fer með ákvörðunarvald safnaðarins í málum þeim sem undir fundinn heyra samkvæmt lögum eða lögmætum ákvörðunum. Aðalfundur er vettvangur starfsskila og reiknisskila af hendi stjórnar safnaðarins og einstakra nefnda á vegum safnaðarins. Þar skulu rædd málefni safnaðarins, þar á meðal þau mál sem lögmælt er að undir fundinn séu borin. Tillögur til aðalfundar skulu berast safnaðarstjórn fyrir 1. mars ár hvert. Óski fólk eftir því að hlusta á fundinn á netinu þarf að skrá sig fyrir kl.12. þann 13. mars á kirkjan@kirkjan.no. Safnaðarmenn njóta kosningarréttar og kjörgengis á safnaðarfundum þegar þeir eru fullra sextán ára.Samhliða aðalfundi verður aðalfundur Ólafíusjóðs haldinn. Verið öll hjartanlega velkomin!