HJÓNAVÍGSLA

Kirkjuleg hjónavígsla er helgiathöfn þar sem brúðhjón gefast hvort öðru og lofa að standa saman í gleði og sorg, styðja hvort annað, deila áhyggjum sínum og tvöfalda gleðina!  

Þar mætast tveir einstaklingar á jafnréttisgrundvelli og heita því að vera hvor öðrum trúr, elska og virða hvor annan, og eiga, njóta og taka saman á móti yndi og erfiðleikum lífsins.  

Athöfnin er tjáning gleði og vonar, samstöðu og ábyrgðar. Viðstaddir umlykja hjónin fyrirbæn og blessunaróskum og vissan um návist Guðs jafnt í daglegu lífi  sem og á stórum stundum veitir hjónunum styrk til að lifa saman í kærleika, samstöðu og umhyggju. 

Kirkjuleg hjónavígsla fer alla jafnan fram í kirkju en hægt er að fá leyfi til að hafa athöfnina heima eða úti undir berum himni. 

Hvað þarf að gera?

• Hafa samband við prestinn og ræða stað og stund, uppbyggingu og yfirbragð athafnarinnar.
• Útvega hjúskaparstöðuvottorð hjá Skatteetaten (https://www.skatteetaten.no/skjema/provingsattest/)

Hjónaefni þurfa að útvega sér hjónavígsluvottorð (no. prøvingsattest) hjá skattayfirvöldum í Noregi (no. skatteetaten) ef þau hafa verið búsett í landinu lengur en 6 mánuði en annars þarf að útvega hjónavígsluvottorð frá því landi sem búið var í og láta fylgja umsókn til skattayfirvalda hér.

Hjónavígsla getur ekki farið fram ef hjónavígsluvottorð berst ekki presti fyrir athöfn. 

 

• Tala saman um umfjöllunarefnin hér að neðan

Venjulega hittir prestur hjónaefni fyrir vígslu einu sinni ef vegalengdir hamla því ekki. Farið er yfir samtalspunkta sem sjá má hér að neðan sem og athöfnina sjálfa.

 

- KÆRU TILVONANDI HJÓN! -

Nú nálgast stóri dagurinn ykkar þegar þið ætlið að gefast hvort öðru og lofa að standa saman í gleði og sorg, styðja hvort annað, deila áhyggjum ykkar og tvöfalda gleðina!

Kirkjuleg hjónavígsla er helgiathöfn. Þar mætast tveir einstaklingar og heita því að vera hvort öðru trú, elska og virða hvort annað, og eiga, njóta og taka saman á móti yndi og erfiðleikum lífsins.

Athöfnin er tjáning gleði og vonar, samstöðu og ábyrgðar. Viðstaddir umlykja hjónin fyrirbæn og blessunaróskum og vissan um návist Guðs jafnt í daglegu lífi  sem og á stórum stundum veitir hjónunum styrk til að lifa saman í kærleika, samstöðu og umhyggju.

Kirkjuleg hjónavígsla fer fram í kirkju en hægt er að fá undanþágu til að hafa athöfnina heima eða úti undir berum himni.

Athöfnin og dagurinn er ykkar, og alveg eins og það er mikilvægt að undirbúa hátíðardaginn þá er líka mikilvægt að nota tækifærið til að undirbúa sambandið. Nú hafið þið tækifæri til að ræða ýmis málefni sem oft gleymist að ræða í dagsins amstri og vita hvaða afstöðu maki ykkar hefur til ýmissa mála. Hér er ekkert rétt eða rangt svar – það er hægt að vera hjartanlega sammála um sumt en sammála um að vera ósammála um annað. Markmiðið er að í hjónabandinu ríki jafnvægi og sátt, og að það sé eðlilegt að ræða og taka til athugunar tilfinningar og afstöðu beggja aðila.

Meðfylgjandi eru punktar fyrir ykkur að tala saman um, velta upp mismunandi nálgun á málunum, tjá ykkar skoðun og sýn, og vera tilbúin að heyra hvað hinu finnst.

Að lokum megið þið gjarnan setja niður á blað nokkrar lýsandi setningar um tilvonandi maka, og tilfinningar ykkar í hans/hennar garð, hvað þið elskið í fari hins – eitt lítið ástarbréf upp á gamla mátann.

Ekki hika við að hafa samband við mig ef eitthvað kemur upp á eða þið viljið ræða eitthvað undir minni handleiðslu.

 

 - SAMTALSPUNKTAR FYRIR VERÐANDI BRÚÐHJÓN -

Samskipti
 Hvað gerið þið til að rækta samband ykkar?
 Hvernig vilduð þið rækta sambandið?

Hvað gerið þið til að rækta ykkur sjálf sem einstaklinga?
 Hvernig tjáið þið tilfinningar ykkar? (Ást, sorg, gleði, reiði, þreytu, vellíðan, óánægju o.s.frv.)
 Hvernig leysið þið ágreining?

Hvað er fyrirgefning í ykkar huga og hvað er sátt?

Viðhorf ykkar til

a)     að leita til þriðja aðila í þrengingum eða erfiðum tímapunktum í lífinu.

b)    atvinnu/náms hvors annars.

c)     trúmála – Hver er ykkar trúarafstaða?

d)    lífsins – Hver eru ykkar lífsgildi?

Fjölskylda og vinir
 Hvernig er samskiptum ykkar háttað við tengdafjölskyldu og/eða aðra í stórfjölskyldunni?
 Hvernig og hvaða áhrif hefur hún á ykkar samband?
 Hvernig er samskiptum ykkar háttað við vini?
 Hvernig og hvaða áhrif hafa þeir á ykkar samband?
 Hvernig er ykkar fjölskylda?

Hver eru framtíðarplön varðandi

a)     barneignir

b)    atvinnu og/eða nám

c)     húsnæði/búsetu

Viðhorf ykkar til

a)     barnauppeldis

b)    þess að leggja rækt við fjölskyldubönd

c)     þess að leggja rækt við vináttubönd

Að reka “fyrirtækið Hjónaband“

Heimilisstörf

a)     Uppvask og þvottur

b)    Hreingerning/tiltekt

c)     Matreiðsla og innkaup

d)    Bíllinn

e)    Viðhald og útiverkin

Skipulagning og ábyrgð

a)     Skipulagning á sameiginlegu fríi

b)    Veikindadagar barna

c)     Utanumhald um læknisheimsóknir

d)    Heimanám, skólaviðburðir og tómstundir barna

e)    Hátíðahöld í fjölskyldu, jólagjafir, afmæli

Fjármál

a)     Skiptur fjárhagur

b)    Sameiginleg  ábyrgð

c)     Ákvarðanir varðandi fjárfestingar og lántöku

Stóra spurningin!
 Hvers vegna vilt þú ganga að eiga tilvonandi maka þinn?
 Lýstu maka þínum í nokkrum setningum.
 Hjónaefnin svari hvort fyrir sig. Sumum fellur betur að skrifa hugsanir sínar niður á blað.
 
 

Hafið endilega samband ef eitthvað kemur upp í samtali ykkar sem þið viljið ræða frekar undir handleiðslu sóknarprests.

Gangi ykkur vel og Guð blessi ykkur!

 

 

 

-HJÓNAVÍGSLAN ER BYGGÐ UPP Á EFTIRFARANDI HÁTT -

BRÚÐARMARS eða annað forspil

(SÁLMUR)

ÁVARP

·       Hefst með signingu og svo ræða og ávarp til brúðhjóna

SÁLMUR

·       Að sálminum loknum ganga brúðhjónin að gráðum.

RITNINGARORÐ OG HJÓNAVÍGSLA.

·       Fyrst lesnir textar (prestur eða aðstandendur, svaramenn…)

·       Hjónaefni spurð tveggja spurninga hvort.

·       Síðan er skipst á hringum.

·       Þau heilsast síðan með hægri hönd er prestur biður þau um það. Prestur leggur hönd sína yfir samanteknar hendur þeirra og lýsir vígslu.

·       Þá krúpa brúðhjónin á gráðurnar, svaramenn setjast saman og er beðið bænar sem endar á “…..um aldir alda.” Allir svara: “amen”. Síðan biðja allir saman Faðir vor.

·       Þá er lýst blessun og brúðhjón rísa á fætur, kyssast og setjast saman.

LAG/SÁLMUR

(BÆN.)

(LAG/SÁLMUR.)

BLESSUN

ÚTGÖNGUMARS eða annað eftirspil

 

 

Ekkert gjald er tekið fyrir hjónavígslu og Íslenska kirkjan í Noregi getur tekið þátt í greiðslu fyrir kirkjuleigu og organista í kirkju. Einnig er hægt að fá hjónavígslu í Ólafíustofu án kostnaðar.

Hægt er að bóka hjónavígslu með því að hafa samband við sóknarprestinn (lilja@kirkjan.no).